tumhaari yaad ka ek silsila rahi khushbu
bahaar ban ke mera rasta rahi khushbu

gale lagaya mujhe man ne alwidaa kaha
tamam umr meri rah-numa rahi khushbu

ajib rishta hai barish ka kachchi mitti se
falak se arz talak rabta rahi khushbu

hasin gulab bhi ab mo'atabar nahin thahre
aur us ki baaton se bargashta ho gai khushbu

kiye hain nazr bahut phul is mohabbat mein
dayar-e-ishq mein tab dil-ruba rahi khushbu

kisi ne hath milaya tha 'sima' chahat se
hatheliyon mein hamari sada rahi khushbu