tumhaari zulf ke sae mein raat thahri hai
ki rang-o-nur liye kaenat thahri hai

na ab junun ki tamanna na hai khirad ki talab
ye kis maqam pe aa kar hayat thahri hai

na puchh kaise guzari hai zindagi hum ne
qadam qadam pe alamnak raat thahri hai

jahan mein jab bhi nazar ko kahin sukun na mila
ummid-gah-e-nazar teri zat thahri hai

bandhe hain pet pe patthar magar ye shan teri
jahan bhi tu ne kaha kaenat thahri hai

tere tufail mein ye bhi jahan ne dekha hai
kai baras ke liye ek raat thahri hai

na jaane kaun si hum se khata hui 'akhtar'
hamare qatl ki har samt baat thahri hai