tum ne rasm-e-jafa utha di hai
hamein kis jurm ki saza di hai

sham-e-ummid kyun jala di hai
ishq tarikiyon ka aadi hai

aap ne khud mujhe sada di hai
ya meri quwwat-e-iradi hai

hum to muddat ke mar gae hote
maut ne zindagi badha di hai

ab dua par bhi e'timad nahin
na-muradi si na-muradi hai

tujh sa bedad-gar kahan hoga
lab-e-har-zakhm ne dua di hai

mukhtalif hain tasawwuraat-e-jamal
ye aqida bhi infiradi hai

dekh fitrat ki bazm-arai
khak par chandni bichha di hai

ye jo chhoti si hai kali sar-e-shakh
bagh ki baad shahzadi hai

lab-e-taswir-e-dost kuchh to bata
kis ne ye khamushi sikha di hai

ai 'saba' kimiya-e-gham ke liye
zindagi khak mein mila di hai