uf ye safar tawil ye chhaalon ka silsila
us par mizaj puchhne walon ka silsila

ab se rahega hum mein mulaqat bhar ka pyar
main khatm kar chuka hun sawalon ka silsila

hasrat rahi ki ji len zara ho ke be-khayal
thahre kabhi kahin to khayalon ka silsila

insan ko sari umr phiraata hai dar-ba-dar
do rotiyon ka chaar niwalon ka silsila

hum hi na apni qaid se bahar nikal sake
warna kahan nahin hai ujalon ka silsila

hum ko chamakti ret pe pani ka hai guman
aaya kahan se hum mein ghazalon ka silsila

mit jaenge wafa ke liye pyar ke liye
hum tutne na denge misalon ka silsila