ujala kar ke zulmat mein ghira hun
charagh-e-rahguzar tha bujh gaya hun

teri taswir kaise ban sakegi
har ek sada waraq ko dekhta hun

mujhe tufan se shikwa nahin hai
halak-e-be-rukhi-e-nakhuda hun

tere tiron ka andaza karunga
abhi to zakhm dil ke gun ga raha hun

tumhein suraj nazar aaenge apne
main aaina hun aur tuta hua hun

saba aahista aahista udunga
main dast-e-naz ka rang-e-hina hun