ukta ke ku-e-yar se ushshaq chal pade
kar-e-wafa ke dekhiye mushtaq chal pade

main uth gaya to dard ki mahfil ujad gai
mere hi sath ishq ke mashshaq chal pade

naqsh-e-qadam pade hain ye qudrat ke ja-ba-ja
duniya-e-dil se uth ke bad-akhlaq chal pade

barg-e-hina se likh ke nasihat zamin par
gulshan ko tere chhod ke auraq chal pade

rishton ke ehtiram ki jin ko na thi tamiz
daman mein apne bandh ke aafaq chal pade

teri nigah-e-naz ne aisa fusun padha
diwane ho ke duniya se ashfaq chal pade

main ne charagh-e-ishq jalae the jo 'nadim'
hamrah mere chhod ke sab taq chal pade