ulta asar ye shikwa-e-bedad se hua
wo aur bhi khafa meri fariyaad se hua

majnun hi se hua na wo 'farhad' se hua
jo kaam ishq mein dil-e-nashad se hua

dushman ki kya majal ki mujh ko bura kahe
jo kuchh hua huzur ke irshad se hua

us dushman-e-wafa ka tasawwur hai phir mudam
majbur main to is dil-e-nashad se hua

allah hi ab ke jaan bachae to bach sake
phir ishq mujh ko ek sitam-ijad se hua

marne ke baad bhi na gai ishq ki khalish
ye uqda hal na khanjar-e-jallad se hua

itna to be-qarar hua tha na dil kabhi
jitna ki muztar aaj teri yaad se hua

jo kaam doston se na ulfat mein ho saka
'hajir' wo kaam ghair ki imdad se hua