umand rahi hain ghataen ki zulf barham hai
chhalak raha hai jo khum hai ki aankh pur-nam hai

nashat-e-zist mayassar nahin to kya shikwa
mujhe hayat se badh kar hayat ka gham hai

phir aaj gardish-e-dauran se mat khai hai
bisat-e-dil hi ulat do ki hausla kam hai

thahar na jae kahin nabz-e-gardish-e-dauran
teri nigah-e-karam ka kuchh aur aalam hai

na shor-e-naghma na raqs-e-subu na khanda-e-gul
chaman mein aaj nigar-e-chaman ka matam hai