ummid ke diye ki mukhalif hawa bhi hai
ladne ka aandhiyon se magar hausla bhi hai

jaane ko tere shahar se tayyar hain magar
hum ja nahin sakenge hamein ye pata bhi hai

hum ne bhi zulmaton ko mitaya hai apne taur
suraj ke sath sath hamara diya bhi hai

koi to hai jo khana-e-hasti mein hai muqim
aawaz mein hamari wahi bolta bhi hai

ummid-e-subh-e-wasl ka dam tutne laga
kuchh kah shab-e-firaq teri intiha bhi hai

chalte chalo ki manzilen aa kar milengi khud
kuchh dar hue hain band to ek dar khula bhi hai

hum khud-pasandiyon se nikalne lage 'shajar'
hum sochne lage hain hamara khuda bhi hai