ummid kya thi aur wo kya de gaya mujhe
kuchh apna kuchh mera hi diya de gaya mujhe

ye waqt bhi ajib hai jo waqfe waqfe se
andaz sochne ka naya de gaya mujhe

is khush-mizaj dost ke qurban jaiye
har zakhm muskura ke naya de gaya mujhe

jo mera ham-safar tha bada hi ajib tha
apni jagah se uth ke jagah de gaya mujhe

shair nahin hun phir bhi main shair-nawaz hun
andaz-e-shairana khuda de gaya mujhe

jab talkhiyan hayat key had se badhin 'nawaz'
tab jina ek alag se maza de gaya mujhe