umr ki sari thakan lad ke ghar jata hun
raat bistar pe main sota nahin mar jata hun

akasr auqat bhare shahr ke sannate mein
is qadar zor se hansta hun ki dar jata hun

mujh se puchhe to sahi aaina-khana mera
khal-o-khad le ke main hamrah kidhar jata hun

dil thahar jata hai bhuli hui manzil mein kahin
main kisi dusre raste se guzar jata hun

sahma rahta hun bahut halqa-e-ahbab mein main
chaar diwar mein aate hi bikhar jata hun

mere aane ki khabar sirf diya rakhta hai
main hawaon ki tarah ho ke guzar jata hun

main ne jo apne khilaf aap gawahi di hai
wo tere haq mein nahin hai to mukar jata hun