un hi pedon pe ki sayon ka guman rakhte hain
munhasir apne liye aag dhuan rakhte hain

jaise poshak pe poshak pahan kar niklen
khud ko aazad takalluf se kahan rakhte hain

hum bhi angur ki shakhon ki tarah uth uth kar
hae taqdir ba-dast-e-digran rakhte hain

zalzale aaenge taslim baja laenge
zohd-pindar abhi koh-e-giran rakhte hain

pahle diwangi ki had hi nahin khinchti thi
samne ab ram-e-ahu ke nishan rakhte hain

is qadar fasle phaila ke kahan baitha hai
tujhe to pas hi misl-e-rag-e-jaan rakhte hain