un ko ahd-e-shabab mein dekha
chandni ko sharab mein dekha

aankh ka e'tibar kya karte
jo bhi dekha wo khwab mein dekha

dagh sa mahtab mein paya
zakhm sa aaftab mein dekha

jam la kar qarib aankhon ke
aap ne kuchh sharab mein dekha

kis ne chheda tha saz-e-masti ko?
ek shoala rubab mein dekha

log kuchh mutmain bhi the phir bhi
jis ko dekha azab mein dekha

hijr ki raat so gae the 'adam'
subh-e-mahshar ko khwab mein dekha