un ki nigah-e-naz ka mastana ho gaya
main hosh mein kuchh aur bhi diwana ho gaya

zahid ka khauf aur na kuchh mohtasib ka dar
ab to mizaj-e-shaikh bhi rindana ho gaya

marne ke baad khul gain sari haqiqaten
jo zindagi mein raaz tha afsana ho gaya

yaaden gain wo shauq wo arman lut gae
aabaad tha jo dil kabhi virana ho gaya

majnun ke baad puchhta tha kaun najd ko
aabaad mere dam se ye virana ho gaya

aulad-e-nek-bakht ki 'azam' se puchhiye
jo apne ghar mein aap hi begana ho gaya