us kam-sukhan ki ab ke guftar dekh lena
har baat par chalegi talwar dekh lena

taqlid kar rahe ho tum jis ke qafile ki
us mir-e-karwan ka kirdar dekh lena

apni tabiaton ke malik hain ye farishte
inkar dekh lena iqrar dekh lena

mutlaq nazar na rakhna mazi ki laghzishon par
khinchega kaun ab ke diwar dekh lena

nazuk mizaj hain wo sunte nahin kisi ki
rakhte hain kya irade sarkar dekh lena

tu kya hai ai 'rafia' ab duniya ke aaine mein
tera maqam kya hai akhbar dekh lena