us masihai ke sadqe kaam-e-jaan tak aa gai
tajribe karte hue naubat yahan tak aa gai

ab to gahwaron pe khadim rakh liye man-bap ne
mamta takhmina-e-sud-o-ziyan tak aa gai

tu ne koshish to yahi ki thi ki ghar mera jale
aag jab bhadki to phir tere makan tak aa gai

is nizam-e-ab-o-gil mein zahr phailane ke baad
phir wahi shorish zamin se aasman tak aa gai

mujh mein aur duniya mein phir kya farq hoga dosto
zindagi ki hai jo talkhi gar zaban tak aa gai

itni qurbat thi hamari apne tir-andaz se
dhaar khun ki jism se nikli kaman tak aa gai

band ye apne tashakhkhus ka na bah jae kahin
mauj-e-sail-e-tund khatre ke nishan tak aa gai