ghurte raston ka aaseb bana hun main to
mujh se mil paoge kya sham-e-bala hun main to

dewtaon se na hoga mera darman-e-zawal
aasmanon ke singhasan se gira hun main to

jate mausam ki tarah us se kabhi mil na saka
ek lamhe ke talluq ki saza hun main to

log galiyon mein hi dhunda kiye aandhi ke suragh
apni aankhon ke hisaron mein bujha hun main to

zahr ban kar wo 'musawwir' meri nas nas mein raha
main ne samjha tha use bhul chuka hun main to