us pe kya guzregi waqt marg andaza laga
muntashir hasti ka apni jis ko shiraaza laga

auliya-allah ki chaukhat ke bhi aadab hain
sar utha kar jo bhi aaya us ko darwaza laga

nur ki chadar tani hai yun faza-e-dahr par
jaise tare todne ko dast-e-khamyaza laga

jaane kis andaz se us shokh ne dali nazar
jo purana zakhm tha wo bhi hamein taza laga

mai-kade ka ek hi dam mein badal jae nizam
su-e-mai-khana bhi 'asi' aisa aawaza laga