use barishon ne chura liya ki wo baadalon ka makin tha
kabhi mud ke ye bhi to dekhta ki mera wajud zamin tha

wahi ek sach tha aur us ke ba'd ki sari tohmaten jhut hain
mere dil ko pura yaqin hai wo mohabbaton ka amin tha

use shauq tha ki kisi jazire pe us ke nam ka phul ho
mujhe pyar karna sikha gaya mera dost kitna zahin tha

kabhi sahilon pe phiroge to tumhein sipiyan hi bataengi
meri aankh mein jo simat gaya wahi ashk sab se hasin tha

tujhe kis tarah se khabar hui ki meri hayat sanwar gai
zara apne dil se to puchh le ye guman tha ki yaqin tha