use kya raat din jo talib-e-didar phirte hain
gharaz hai to gharaz ke waste sau bar phirte hain

idhar dekho bhala hum ko zamana kya nahin kahta
to kya har ek se karte hue takrar phirte hain

jo ab wahshat nahin bhi hai to apni chaal kyun chhoden
jidhar ji chahe din-bhar raat-bhar be-kar phirte hain

teri khatir mohabbat ho gai hai dil ki wahshat se
hamein aawara-pan par aa gaya hai pyar phirte hain

tadapne lutne ki aaj un tak bhi khabar pahunchi
mujhe badnam karne ko mere gham-khwar phirte hain

use hum mante hain to zamane-bhar se achchha hai
magar achchhe bhi apne qaul se ai yar phirte hain

samajhte hain samajhne wale us ko bhi riya-kari
gali-kuchon mein kyun tere sitam-bardar phirte hain

tumhein afsos kyun hai aashiqon ki kucha-gardi par
phiraata hai muqaddar ye khudai khar phirte hain

kahin aisa na ho ek roz tum bhi hum se phir jao
yahan pahle hi apni jaan se bezar phirte hain

wo dil ki aarzu ab hai na us ki justuju ab hai
hamare panw mein chakkar hai hum be-kar phirte hain

kisi kafir ka ghar tha ya nahin malum jannat thi
abhi tak meri aankhon mein dar-o-diwar phirte hain

zamane se nirala hai chalan in husn walon ka
laqab to qatil-e-alam hai be-talwar phirte hain

safi' ko tum ne to koi bada pahuncha hua samjha
aji rahne bhi do aise bahut makkar phirte hain