usi ki sara zamana misal deta hai
jo karke nekiyan dariya mein dal deta hai

tera khayal achanak nadi mein yaadon ki
gae zamane ke lamhe uchhaal deta hai

ye waqt hai jo sada mehrban nahin hota
uruj de ke payam-e-zawal deta hai

jawab dhundne niklen to umr kat jae
har ek pal hamein itne sawal deta hai

gale laga lun main 'zahid' bula ke khwabon mein
tera khayal mujhe ye kamal deta hai