usi maqam pe ja kar hamein thaharna hai
jahan se khalq-e-khuda ko kabhi guzarna hai

hamara haal bhi achchha nahin hai barson se
magar isi mein guzar aur basar bhi karna hai

har ek samt se yalghaar raushni ki hai
hamein to roz andhere mein yunhi rahna hai

wo ek zat jo donon jahan ka khaliq hai
daraaz dast-e-talab bhi usi se karna hai

hamein in aainon se kuchh gharaz nahin 'rizwan'
usi ke aks-e-musalsal hi se sanwarna hai