us ke kuche ki taraf tha shab jo danga aag ka
aah se kis ki pada tha wan patinga aag ka

jang hai kis aatishin-khu se jo rahta hai mudam
tegh-e-uryan ki tarah har shoala nanga aag ka

toshe-danon mein bhare rahte hain un ke kartoos
is liye khatra rakhe hai har tilanga aag ka

tah se us ki surkh ho kar kab na nikli mauj-e-barq
kab shafaq ne khun mein pairahan na ranga aag ka

shama ke shoale pe mauquf us ka jal jaana nahin
'mushafi' jis ja ho aashiq hai patinga aag ka