us ke nazdik gham-e-tark-e-wafa kuchh bhi nahin
mutmain aisa hai wo jaise hua kuchh bhi nahin

ab to hathon se lakiren bhi miti jati hain
us ko kho kar to mere pas raha kuchh bhi nahin

chaar din rah gae mele mein magar ab ke bhi
us ne aane ke liye khat mein likha kuchh bhi nahin

kal bichhadna hai to phir ahd-e-wafa soch ke bandh
abhi aaghaz-e-mohabbat hai gaya kuchh bhi nahin

main to is waste chup hun ki tamasha na bane
tu samajhta hai mujhe tujh se gila kuchh bhi nahin

ai 'shumar' aankhen isi tarah bichhae rakhna
jaane kis waqt wo aa jae pata kuchh bhi nahin