us ki ye shart ki har lafz faqat us ka ho
mujh ko ye zid ki jo mani ho mera apna ho

hont sil jaen to aankhon se bayan ho jae
dard ai dosto itni to kasak rakhta ho

main samundar ka bhi saman liye chalta hun
rah mein kya ye zaruri hai faqat sahra ho

aaj to lagta hai mazbut tumhaara ye bandh
kal kise ilm ki dariya ka irada kya ho

tum ne har rah pe ek rok laga to di hai
ye zara soch lo gar phir bhi hamein jaana ho

'abid' ek bar zara napen to us ke qad ko
ain mumkin hai yunhi sab se bada lagta ho