umr sahra-e-khamoshi mein guzaren kaise
bar bar us ki jagah khud ko pukaren kaise

tiktiki bandh ke main dekh raha tha phir bhi
kat gai meri nigahon se bahaaren kaise

jis mein tufan hai na tufan ke koi aasar
kashtiyan aise samundar mein utaren kaise

raat ke dasht mein nadida dayaron ka safar
aisi surat mein koi rah sanwaren kaise

log 'abid' ke liye sang-ba-kaf phirte hain
us ko is shahr ki galiyon se guzaren kaise