us ko firaq-e-yar ka matlab nahin pata
matlab use bhi pyar ka matlab nahin pata

marna to chahte hain magar kya karen ki jab
sanson ko ikhtiyar ka matlab nahin pata

mujh ko bhi ab yaqin kisi baat par nahin
us ko bhi e'tibar ka matlab nahin pata

rakhte ho tum hisab gham-e-zindagi ka jo
kya tum ko be-shumar ka matlab nahin pata

us se gila karen bhi agar hum to kis liye
jis ko ki gham-gusar ka matlab nahin pata

go kar raha hai gul ki hifazat shajar magar
patjhad ko nau-bahaar ka matlab nahin pata