us ko jab ki mere anjam se kuchh kaam nahin
mujh ko bhi ishq ke iqdam se kuchh kaam nahin

jazba-e-ishq na pahuncha saka jab main us tak
mujh ko ab nama-o-paigham se kuchh kaam nahin

ghar mein jis ke liye rahta tha wahi ab na raha
ab mujhe ghar ke dar-o-baam se kuchh kaam nahin

muntazir rahti thi har sham teri qurbat ki
tu nahin jab to mujhe sham se kuchh kaam nahin

ilm ka jam dar-e-ilm se milta hai mujhe
mujh ko to aur kisi jam se kuchh kaam nahin