us ne chaha ki kuchh kamal bane
tab hamare ye khadd-o-khal bane

phir na mausam bhi waisa saf hua
phir na waise hamare baal bane

thik hai hum pe ungliyan utthin
baat ye hai ki hum misal bane

ek ghaibi khuda ke hote hue
kaun hai jo hamari dhaal bane

dekhiye kya jawab aata hai
phir rahe hain tera sawal bane

hasb-e-dastur wo bhi tha maghrur
shukr hai hum bhi hasb-e-haal bane

aap jaise hasin bhi kam hain
log hum se bhi khal-khal bane