us ne kuchh mujh se kaha tha shayad
ya mujhe wahm hua tha shayad

chaar-su raqs-kunan thi khushbu
phul patton mein chhupa tha shayad

yunhi aanchal nahin lahraya tha
kuchh hawaon pe likha tha shayad

dida-e-tar ne bhi mayus kiya
naqsh pani pe bana tha shayad

sans kyon rukne lagi thi meri
rabta tut gaya tha shayad

main ne hi zulm kiya tha khud par
wo hi sach bol raha tha shayad

na-muradi ki shikayat kaisi
yahi qismat ka likha tha shayad