utho zamane ke aashob ka izala karen
ba-nam-e-gul-badnan rukh su-e-piyala karen

ba-yaad-e-dida-e-makhmur pur-piyala karen
utho ki zahr ka phir zahr se izala karen

wo rind hain na uthaen bahaar ka ehsan
warud hum teri khalwat mein be-hawala karen

kahan ke dair o haram aao ek sajda-e-shauq
bapa-e-hosh-e-rubayan-e-bast-sala karen

baras pade jo gulistan mein us nazar se sharab
bahak bahak ke hum aage subu-e-lala karen

subu utha ki gadayan-e-ku-e-mai-khana
tere hawale mah-o-mehr ka qabaala karen

hadis-e-zohd ho ya wardat-e-zahra-misal
kisi ke nam ko hum zeb-e-har-maqala karen

dikha sahifa-e-rukh is tarah ki ahl-e-bahaar
waraq waraq ba-khajalat bayaz-e-lala karen

utho jala ke mai-e-surkh se charagh-e-abad
nashat-e-sohbat-e-shab ko hazar-sala karen

ada wo nichi nigahon ki hai ki jaise 'zafar'
talash-e-kunj-e-ghazalan-e-khurd-sala karen