wada-e-wasl-e-yar ne mara
lazzat-e-intizar ne mara

jalwa-e-gul-ezar ne mara
ek jaan-e-bahaar ne mara

paemal-e-gham-e-hawadis hun
sitam-e-rozgar ne mara

na khula uqda-e-fareb-e-shuhud
dida-e-e'tibar ne mara

dast-e-jaur-e-khizan ka kya shikwa
mujh ko josh-e-bahaar ne mara

jabr aur wo bhi kis ghazab ka jabr
tohmat-e-ikhtiyar ne mara

de ke 'farrukh' mujhe payam-e-wafa
ek taghaful-shiar ne mara