wada tha kab ka bar-e-khuda sochne to de
maqul koi uzr naya sochne to de

parchi wo jis pe likkha hua hai pata tera
rakh kar kahan main bhul gaya sochne to de

wo hijr bhi to gungi paheli se kam na tha
ab wasl aa pada hai zara sochne to de

ai chaal-baz aise na itra ke muskura
chalne de chaal mujh ko zara sochne to de

hon ikhtiyar se bhi pare kuchh tasarrufat
andesha-e-hisab hata sochne to de

jo ho gaya main us pe hun raazi khuda qasam
ye kyun hua ye kaise hua sochne to de