wade par e'tibar ki ghadiyan
iztirab-o-qarar ki ghadiyan

dil ki dhadkan pa gin rahe hain hum
aap ke intizar ki ghadiyan

kuchh yaqin kuchh guman mein kati hain
hum ne lail-o-nahaar ki ghadiyan

yaad-e-mazi ummid-e-mustaqbil
dil ke gharq aur ubhaar ki ghadiyan

hain mayassar junun ke sadqe mein
dasht mein bhi bahaar ki ghadiyan

aap ki ek nazar ki qimat hain
dil ke sabr-o-qarar ki ghadiyan

hain mere ijz-o-inkisar talak
teri shan-o-waqar ki ghadiyan

mil rahi hain 'shamim' ke dam tak
bagh-o-gul ko bahaar ki ghadiyan