wafa ka zikr hi kya hai jafa bhi ras aae
wo muskurae to jurm-e-khata bhi ras aae

watan mein rahte hain hum ye sharaf hi kya kam hai
ye kya zarur ki aab-o-hawa bhi ras aae

hatheliyan hain teri lauh-e-nur ki manind
khuda kare tujhe rang-e-hina bhi ras aae

dawa to khair hazaron ko ras aaegi
maza to jine ka jab hai shifa bhi ras aae

to phir ye aadmi khud ko khuda samajhne lage
agar ye umr-e-gurezan zara bhi ras aae

ab is qadar bhi na kar justaju-e-ab-e-baqa
gul-e-hunar hai to baad-e-fana bhi ras aae

ye tera rang-e-sukhan tera bankpan ai 'shaz'
ki sher ras to aae ana bhi ras aae