wafa kar magar ustuwari na rakh
koi bojh sine pe bhaari na rakh

mohabbat ke badle mohabbat na mang
ki ye silsila karobari na rakh

kisi aur hile se kar mustafiz
faqat rasm-e-baada-gusari na rakh

tu aaya hai to harf-e-matlab pe aa
zaban par bahut khaksari na rakh

salamat nahin sar to dastar kya
bahut unchi apni atari na rakh

haqiqat tujhe mar dalegi sun
'mujibi' bahut jaankari na rakh