wafa ki aag mein pahle pighal ke dekho to hai ishq kya ye samajh loge jal ke dekho to wo sang-e-rah nahin koh-e-nur hira hai nazar ke zawiye apni badal ke dekho to sukun-e-dil ka khazana zarur paoge hawas ke nag ko pahle kuchal ke dekho to har ek aankh ka aansu tumhaara apna hai hisar-e-zat se bahar nikal ke dekho to tawangaron ki ziyafat ko jaan jaoge zara ye qimti kapde badal ke dekho to hai haq ka rasta kya khud-bakhud samajh loge dahakti aag pe do gam chal ke dekho to khud apni asl haqiqat ko jaan loge 'wafa' tum aaine ko kabhi aankh mal ke dekho to