ye zist ranj mein guzre ki shadman guzre
tere baghair jo guzre to raegan guzre

ba-qaid-e-hosh jo guzre ba-qaid-e-jaan guzre
wo kya maqam-e-mohabbat se kaamran guzre

nazar ko apni basarat bhi jab giran guzre
khuda kare na phir aankhon se wo saman guzre

dayar-e-shauq se jab bahr-e-imtihan guzre
hum apni jaan se guzre to kaamran guzre

qadam qadam pe khirad sadd-e-rah thi lekin
junun-e-shauq salamat rawan-dawan guzre

ye mai-kada wo jagah hai jahan se ai saqi
nazar churae hue gardish-e-jahan guzre

chaman-parast hun mujh ko chaman se ulfat hai
bala se us mein bahaar aae ya khizan guzre

tera karam hai jo saya-fagan to kya gham hai
hazar bar mere sar se aasman guzre

kisi ka faiz 'mubarak' nahin to phir kya hai
ki hum jahan se bhi guzre hain kaamran guzre