wafa ki khair manata hun bewafai mein bhi
main us ki qaid mein hun qaid se rihai mein bhi

lahu ki aag mein jal-bujh gae badan to khula
rasai mein bhi khasara hai na-rasai mein bhi

badalte rahte hain mausam guzarta rahta hai waqt
magar ye dil ki wahin ka wahin judai mein bhi

lihaz-e-hurmat-e-paiman na pas-e-ham-khwabi
ajab tarah ke tasadum the aashnai mein bhi

main das baras se kisi khwab ke azab mein hun
wahi azab dar aaya hai is dahai mein bhi

tasadum-e-dil-o-duniya mein dil ki haar ke baad
hijab aane laga hai ghazal-sarai mein bhi

main ja raha hun ab us ki taraf usi ki taraf
jo mere sath tha meri shikasta-pai mein bhi