wafur-e-sharm se main mar raha tha
khud apna tajziya jab kar raha tha

jo mere pyar ka dam bhar raha tha
mere haalat se wo dar raha tha

khud apni zat ko dhoke diye the
guman ye hai mohabbat kar raha tha

use manzil ki hasrat kha gai hai
wo jis ke sath ek rahbar raha tha

khuda jaane main kyon kar bach gaya hun
wo mujh par war paiham kar raha tha

labon par khelti thi muskurahat
junun-e-shauq aahen bhar raha tha

khirad wale mujhe apna rahe the
agarche main junun-parwar raha tha