wahi barbaadi-e-gulshan ka mujib the aur ab bhi hain
chaman sara ho is se aashna to kya tamasha ho

koi patta bina jis ke ishaare ke nahin hilta
katahre mein gar aae wo bala to kya tamasha ho

khudai aafaton se wo bala mar sakti hai lekin
kisi insan se ho ye hadisa to kya tamasha ho

tamasha des ka jis ne bana rakha hai sadiyon se
rakhen hum us se ummid-e-wafa to kya tamasha ho

main kya kya sochta rahta hun jaise baad 'hasrat' ke
hon jo mazul andaz-o-ada to kya tamasha ho