wahshat-e-baam-o-dar se bhagte hain
jab kabhi apne ghar se bhagte hain

hath malta hai dida-e-hairan
log itna hunar se bhagte hain

jis mein kuchh bhi bura nahin lagta
aise husn-e-nazar se bhagte hain

mere is shahr-e-be-yaqin ke log
shor se aur shar se bhagte hain

aisa badla mizaj-e-ab-o-hawa
ped apne samar se bhagte hain

qahqahon mein jo the sharik wahi
ab meri chashm-e-tar se bhagte hain

'badr' hum hain ghazal-e-dasht-e-junun
wo jidhar ho udhar se bhagte hain