wajud-e-ishq ka koi sira mila nahin mila
khudi mili nahin mili khuda mila nahin mila

tamam shahr mein mile gale hazar raat se
magar kahin kisi jagah diya mila nahin mila

tumhein hamari ruh ke nishan mile nahin mile
hamein tumhaare jism ka pata mila nahin mila

ye ahd rad ka ahd tha so rasm mustarad hui
masih-e-waqt dar par khada mila nahin mila

zamin-e-dasht-e-yaad bhi hawa-e-sang-dil ki hai
koi nishan der tak pada mila nahin mila