waqt-e-mushkil mein bhi honton par hansi achchhi lagi mere khaliq ko meri ye bandagi achchhi lagi dho raha tha bas yunhi main aaj tak apna wajud tum se mil kar mujh ko apni zindagi achchhi lagi bas lihazan phenk kar cigaret kinare ho gaya mujh ko nasl-e-nau ki ye sharmindagi achchhi lagi lab tumhaare mir ki us pankhudi ke misl hain is liye mujh ko meri tishna-labi achchhi lagi khun ke rishte hue jab bhi kabhi nazr-e-ana bhai ko mahfil mein bhai ki kami achchhi lagi surat-o-sirat ka wo itna hasin tha imtizaj ahl-e-danish ko meri diwangi achchhi lagi chand urdu lafz bhi shamil the jumlon mein tere is liye 'shaarib' unhen boli teri achchhi lagi