waqt ka intikhab hain hum log
bani-e-inqalab hain hum log

koi hum sa nahin zamane mein
aap apna jawab hain hum log

tere qadmon ki khak hain saqi
rashk-e-sad-aftab hain hum log

husn mein aap be-misal sahi
ishq mein la-jawab hain hum log

husn walo hamari qadr karo
husn ki aab-o-tab hain hum log

mat khai hai dil ki bazi mein
kis qadar kaamyab hain hum log

sar adab se jhukaiye 'talib'
ek muqaddas kitab hain hum log