waqt ke kitne hi dhaaron se guzarna hai abhi
zindagi hai to kai rang se marna hai abhi

kat gaya din ka dahakta hua sahra bhi to kya
raat ke gahre samundar mein utarna hai abhi

zehn ke reze to phaile hain faza mein har su
jism ko tut ke har-gam bikharna hai abhi

ye saje baam jawan chandni yun lagta hai
ek sitam aur tere shahr ne karna hai abhi

ek ek rang uda le gai be-mehr hawa
kitne khake hain jinhen 'sham' ji bharna hai abhi