wo aur kuchh nahin ek tarz guftugu ki thi
kaha ye kis ne kabhi teri aarzu ki thi

kabhi bhi apni tabiat na jang-ju ki thi
wahan ana ki nahin baat aabru ki thi

jo zakhm tha to zara khun hi tapakta tha
jalan tamam tere sozan-e-rafu ki thi

tera jamal tha ya tha tilism-e-hosh-ruba
lalak ajib se mujh mein bhi justuju ki thi

samundaron ka wo ghussa tha ya zamin ka itab
tamam shorish-e-tufan mere lahu ki thi

guman guman hai guman hi rahe to achchha hai
sada-e-qulqul-e-mina talab subu ki thi

dahan-e-zakhm kahan tha 'shamim' kya malum
lahu uchhaal ki shiddat rag-e-gulu ki thi