wo bhala hai to wo bhala hi sahi
main bura hun to main bura hi sahi

sajid-e-sahab-e-baqa hun main
khak-e-pa hun to khak-e-pa hi sahi

walihana hai un se pyar mujhe
bawla hun to bawla hi sahi

na-ummidi mein hai ummid hamein
un ka har wada khokhla hi sahi

dilkashi ka jawab koi nahin
zindagi chahe bulbula hi sahi

apni sohbat pe koi farq nahin
wo bada hai to wo bada hi sahi

parsai hum us ki man gae
koi ab dudh ka dhula hi sahi

wo bhi auron se mangta hai wafa
chahe 'nami' wo bewafa hi sahi