wo bhi gumrah ho gaya hoga
mera bad-khwah ho gaya hoga

mere haq mein jo bol uttha hai
dard-agah ho gaya hoga

sajda-e-shauq jo ada na hua
sang-e-dargah ho gaya hoga

hadse ki hamein khabar hi nahin
khair nagah ho gaya hoga

waqia aap tak nahin pahuncha
nazr-e-afwah ho gaya hoga

surat-e-haal dekh kar wo bhi
tere hamrah ho gaya hoga

waqt ke sath sath us ka qad
aur kotah ho gaya hoga

is baras bhi na aa saka 'fartash'
waqf-e-tankhwah ho gaya hoga