wo doshiza mahak jab se udi hai
fazaon mein mohabbat ghul gai hai

asar us ki kisi jumbish ka hai ye
jo har zarre mein phaili raushni hai

nahin hai jis jagah tahzib ka rang
wahan bas tirgi hi tirgi hai

ki hum jhute ko sachcha man baithe
ye laffazi ki hi jadugari hai

kahan hota kabhi koi mukammal
sabhi mein kuchh na kuchh yaro kami hai

mera saya mere qadmon ke niche
yun shayad zindagi aadhi hui hai